മഹാവിഷ്ണു ശുക്ലത്തില്‍ കിടക്കുന്നോ?

Disclaimer:

"മഹാവിഷ്ണു ശുക്ലത്തില്‍ കിടക്കുന്നു" എന്നു സ്ഥാപിക്കാനല്ല, അങ്ങനെയല്ല എന്നു സ്ഥാപിക്കാന്‍ വേണ്ടിയാണ് ഈ പോസ്റ്റ്‌. ആര്യന്‍ ഗോത്രങ്ങളില്‍ ഒന്നായിരുന്ന വൃഷ്ണി ഗോത്രത്തിന്റെ കുലദൈവമായിരുന്നു വിഷ്ണു എന്നാണ് എന്റെ പരിമിതമായ അറിവ്. അങ്ങനെ ചിന്തിക്കുന്നതാവട്ടെ ഹൈന്ദവ വിശ്വാസത്തിന് എതിരല്ല താനും. അതിനു പകരം വിഷ്ണു ഒരു മൂര്‍ത്തിയല്ല ഒരു പ്രതീകമാണ് എന്നും ഹിന്ദു ദൈവങ്ങള്‍ ലൈംഗികതയെ പ്രതീകാത്മകമായി സൂചിപ്പിക്കുന്ന സങ്കല്‍പ്പങ്ങള്‍ ആണെന്നും പറഞ്ഞുവെക്കുന്നവരാണ് യഥാര്‍ത്ഥത്തില്‍ ഹൈന്ദവ വിശ്വാസികളുടെ മതവികാരത്തെ വ്രണപ്പെടുത്തുന്നത്.  കൈവെട്ടാനോ തലവെട്ടാനോ ഉദ്ദേശമുണ്ടെങ്കില്‍ ഇത്തരം വിഡ്ഢിത്തങ്ങള്‍ എഴുന്നള്ളിക്കുന്ന "ശാസ്ത്രജ്ഞന്‍'മാരുടെ കൈയും തലയും പോയി വെട്ടുക.

മന്ദബുദ്ധികളായ സംസ്കൃതഗോത്രവര്‍ഗക്കാര്‍ പണ്ട് എഴുതിക്കൂട്ടിയ ഓലക്കെട്ടുകള്‍ ധാരാളം വിവരക്കേടുകളുടെ ഒരു മഹാശേഖരമാണ്. ഹിന്ദുമതത്തെ ഒരു ഏകമാനമതം ആക്കിയെടുക്കാന്‍ സിദ്ധാന്തങ്ങള്‍ ചമച്ചവര്‍ ഈ വിവരക്കേടുകളെയാണ് ഹിന്ദുമതത്തിന്റെ അടിസ്ഥാനശിലയായി അവതരിപ്പിച്ചത്. അതുകൊണ്ടാണ്‌ പില്‍ക്കാലത്ത് ഹിന്ദുക്കള്‍ എന്നു സ്വയം അറിയപ്പെടാന്‍ ആഗ്രഹിച്ച ജനത ഈ വിവരക്കേടുകള്‍ക്ക് സാധൂകരണം നല്‍കാന്‍ നിര്‍ബന്ധിതരായത്.

മുന്‍കാലങ്ങളില്‍ അവര്‍ണ്ണര്‍ക്ക് സംസ്കൃതമോ വേദങ്ങളോ പഠിക്കാന്‍ അനുവാദം ഉണ്ടായിരുന്നില്ല. അതുകൊണ്ട് മഹത്തരം എന്ന് പ്രകീര്‍ത്തിക്കപ്പെടുന്ന ഇത്തരം രചനകളില്‍ കാണപ്പെടുന്ന വിഡ്ഢിത്തങ്ങള്‍ നൂറ്റാണ്ടുകളോളം ബഹുഭൂരിപക്ഷം ജനങ്ങളും അറിയാതെ കിടന്നു. എന്നാല്‍ ആധുനികതയുടെ വരവോടെ ഈ ഭോഷ്ക്കുകള്‍ പരക്കെ തുറന്നുകാട്ടപ്പെടുകയും ഇവയുടെ അടിസ്ഥാനത്തില്‍ നിലനില്‍ക്കുന്നതായി വിശ്വസിക്കപ്പെടുന്ന ഹിന്ദുമതം മറ്റു മതവിശ്വാസികളുടെയും അവിശ്വാസികളുടെയും മുന്‍പില്‍ തരംതാണ ഒന്നായി ഗണിക്കപ്പെടുകയും ചെയ്തു. ഹിന്ദുമതത്തിന്റെ അടിസ്ഥാനം വേദോപനിഷത്തുകളും പുരാണേതിഹാസങ്ങളുമല്ല, യഥാര്‍ത്ഥത്തില്‍ ഇവയൊക്കെ പില്‍ക്കാലത്ത് ഹിന്ദുമതത്തിന്റെ ഭാഗമായതാണ് എന്നുള്ള യാഥാര്‍ത്ഥ്യം തുറന്നുകാട്ടി വേണമായിരുന്നു യഥാര്‍ത്ഥത്തില്‍ ഈ പ്രതിസന്ധിയെ നേരിടേണ്ടിയിരുന്നത്. അതിനു പകരം ഇതേ വേദേതിഹാസങ്ങളെ പുനര്‍വ്യാഖ്യാനിച്ച്‌ അവയില്‍ നിന്ന് ശാസ്ത്രസത്യങ്ങളും സിദ്ധാന്തങ്ങളും കുഴിച്ചെടുക്കാനും ആധുനിക ശാസ്ത്രഗ്രന്ഥങ്ങളുടെ നിരയിലേക്ക് ഈ ഓലക്കെട്ടുകളെ പ്രതിഷ്ഠിക്കാനുമാണ് ചിലരെങ്കിലും ശ്രമിക്കുന്നത്. ഇത്തരം പുനര്‍വ്യാഖ്യാനക്കാരെ എല്ലായിടത്തും കാണാന്‍ സാധിക്കും. വാസ്തുവിദ്യയെയും ആയുര്‍വേദത്തെയും ഒക്കെ ശാസ്ത്രങ്ങളാക്കി അവതരിപ്പിക്കുക വഴി ഈ രാജ്യത്തെ ആധുനിക സമൂഹത്തെ വേദകാലഘട്ടത്തില്‍ തളച്ചിടാം എന്നിവര്‍ സ്വപ്നം കാണുന്നു. ഹിന്ദുത്വം എന്നത് ഒരു മതമല്ല, ഒരു സംസ്കാരമാണ് എന്നിവര്‍ പറയും. അതായത് നിങ്ങള്‍ ഏതു മതക്കാരനെങ്കിലുമാവട്ടെ, നിങ്ങള്‍ ഹിന്ദുത്വം എന്ന സംസ്കാരത്തെ സ്വീകരിക്കാന്‍ ബാധ്യസ്ഥരാണെന്നു വ്യംഗ്യം.

പുരാണത്തിലെ ദൈവസങ്കല്‍പ്പങ്ങളെ വ്യാഖ്യാനിച്ച് ആശയങ്ങളോ ഗുണഗണങ്ങളോ ആക്കി മറ്റു സമുദായക്കാര്‍ക്കു കൂടി സ്വീകാര്യമാക്കിയെടുക്കുക, ജന്തുജീവികളെ ആരാധിക്കുന്ന ബ്രാഹ്മണവേദാന്തികളെ മഹത്തായ ആശയങ്ങളെയും ശാസ്ത്രസത്യങ്ങളെയും പ്രതീകാത്മകമായി ആചരിക്കുന്ന മഹാന്മാരായി ചിത്രീകരിക്കുക, ഇതൊക്കെയാണ് ഇത്തരം സര്‍ക്കസുകാരുടെ പ്രധാന ഐറ്റങ്ങള്‍.

ഗാന്ധീവം ബ്ലോഗില്‍ പാര്‍ത്ഥന്‍ എഴുതിയ "ബ്രഹ്മാവും വിഷ്ണുവും ചരിത്ര പുരുഷന്മാർ ?" എന്ന പോസ്റ്റിലെ ചില ഭാഗങ്ങള്‍ കാണൂ:

"മഹാവിഷ്ണു പാൽകടലിലാണ് ശയനം. നാരത്തിൽ അയനം ചെയ്യുന്നതുകൊണ്ട് വിഷ്ണുവിനെ നാരായണൻ എന്നു വിളിക്കുന്നു. ഈ ജലത്തിന് പാലിന്റെ നിറമാണ്. പാലും ഒരുമാതിരി ജലം തന്നെയല്ലെ. ജലമാണ് അധിഷ്ഠാന സത്യം. ജീവന്റെ ആരംഭം ജലത്തിൽ നിന്നാണ്. ആദ്യത്തെ ജീവസ്പന്ദം കോശദ്രവത്തിലാണ് കാണപ്പെടുന്നത്. അപ്പോൾ കോശമല്ലെ നാരായണൻ എന്നു പറയുന്നത്. പാലിന്റെ നിറമാണ് ശുക്ലത്തിനും. ജീവനെ ജനിപ്പിക്കുന്ന ബീജം ശയിക്കുന്നത് ശുക്ലത്തിലാണ്. ചുരുണ്ടു കിടക്കുന്ന അനന്തൻ എന്ന പാമ്പിന്റെ പുറത്തല്ല അകത്താണ് വിഷ്ണു കിടക്കുന്നത്. പ്രത്യുത്പാദനത്തിന്റെ പ്രതീകമായിട്ടാണ് സർപ്പത്തെ കണക്കാക്കുന്നത്. ആടുന്ന പാമ്പ് പുരുഷനിലും, പാമ്പ് പുനം തേടുന്നത് സ്ത്രീയിലും. കോശത്തിനകത്തെ ക്രോംമോസൊം മുതൽ അണ്ഡകടാഹം വരെ എവിടെയും ദർശിക്കാവുന്നതാണ് ഈ പാമ്പിന്റെ പ്രതീകം. ജനനേന്ദ്രിയത്തിന്റെ പ്രതീകമായ പൂക്കൾ ചെടിയുടെ ലിംഗമാണ്. പുരുഷനിൽ നിന്നും സ്ത്രീയോനിയിൽ പ്രവേശിക്കുന്ന ബീജം പിറക്കാൻ പോകുന്ന കുഞ്ഞിനു നാഭീചക്രത്തിലാണ് പ്രാണനും ഊർജ്ജവും നൽകുവാനുള്ള നാളത്തെ ഉണ്ടാക്കിവെക്കുന്നത്. അതാണ് വിഷ്ണുവിന്റെ നാഭിയിൽ നിന്നും പ്രജാപതി വന്നു എന്ന സങ്കല്പം. ഒരു കോശം തന്നെ വർദ്ധിച്ച് അനേകം കോശങ്ങളാകുന്ന ഈ സംഭവം നാലു വഴിക്കും പുരോഗമിക്കുന്നു. നിരന്തരമായ വർദ്ധനവിൽകൂടി പ്രജയെ ഉണ്ടാക്കിക്കൊണ്ടിരിക്കുന്നതിനാൽ ബ്രഹ്മാവ് പ്രജാപതിയാണ്. സംരചനാ പ്രക്രിയക്ക് ദേവതാരൂപം നൽകിയതാണ് ബ്രഹ്മാവ് എന്ന കല്പന. ബ്രഹ്മമെന്നാൽ വർദ്ധനവുള്ളത്. പ്രപഞ്ച സൃഷ്ടിയിലും ഈ വർദ്ധനവ് കാണാവുന്നതാണ്. ഇത്ര ഗുപ്തവും ഗൌരവവുമായ ഒരു വിഷയത്തെ ഭാരതീയ ശാസ്ത്രങ്ങളിൽ പ്രതീകാത്മകമായി പറഞ്ഞതു തന്നെയാണ് അവസാനം ശാസ്ത്രവിരോധമുള്ള കെട്ടുകഥകളായി ഭാരതീയ ജനതയെ ഇപ്പോൾ മൂന്നാം തരം വിശ്വാസികളാക്കിയിരിക്കുന്നത്."

ചുരുക്കിപ്പറഞ്ഞാല്‍ പാര്‍ത്ഥന്റെ "കണ്ടെത്തലുകള്‍" ഇതൊക്കെയാണ്:

·         അനന്തശായിയായ മഹാവിഷ്ണു പുരുഷ ലൈംഗികകോശമായ പുംബീജം ആണ് !!

·         പാലാഴി എന്നാല്‍ ശുക്ലമാണ് !!!

·         ഇതൊക്കെ എഴുതിവച്ച സംസ്കൃത അണ്ണന്മാര്‍ പണ്ടുതന്നെ  വേദാന്തമൈക്രോസ്കോപ്പ് ഉപയോഗിച്ച് ഈ കോശങ്ങളെ ഒക്കെ കണ്ടുപിടിച്ചിരുന്നു. (എളിമ കൊണ്ട് പുറത്തു പറഞ്ഞില്ല, പകരം ആ കോശത്തിന് ഒരു മുഖവും നാലുകൈകളും കുറിയും കിരീടവുമൊക്കെ വരച്ചുവച്ച് അതിനെ ആരാധിക്കുകയും അമ്പലങ്ങളില്‍ പ്രതിഷ്ഠിക്കുകയും ചെയ്തു.)

നാരായണ.. നാരായണ..!!